每個人都想名成利就，但唔係個個都有足夠意志力去管理好自己既財務。一個能幹既企業家會話你聽，財富唔會突然喺個天跌落黎，而係好多年既努力同埋自律既成果。而成功既第一步，往往係建立一個良好既理財態度。

學習良好既理財習慣，同時戒走唔好既習慣，一啲都唔容易。但唔使怕！MoneyHero參考左Business Insider, Learnvest, Investopedia等等既資料，為你綜合出一個理財金字塔，幫你打好基礎，管理財富！

1. 基本開支

金字塔既第一層包括左唔同必要開支，例如：食物，住宿，水電費，學費等等⋯如果想財務穩定啲，淨係啱啱收支平衡係唔夠架。你需要可以養埋父母（或者老婆仔女）、存錢、同埋有能力還清欠債。要做到以上呢幾點，就必須有一份穩定既收入來源。

2. 安全保障

黎到金字塔既第二層，相信你賺既錢已經足夠你過得舒舒服服，餓你唔死之餘，重可以定時還到信用卡卡數。呢個時候，你應該開始制定一個預算，確保除左基本開支之外，你每個月都可以有錢淨。為左避免不必要既支出，亦即係你要決定咩係必須，咩野唔係！

雖然有閒錢喺手就會好想用左佢，但我地強烈建議你最好用啲錢黎買返份醫療保險，或者儲起佢，以便不時之需。當然，如果你兩樣都做到晒就梗係最好啦。除此之外，黎到呢一層，你重需要進一步了解一下複雜啲既理財項目，例如稅務，同埋點儲錢買樓。

另外一樣要提下你既就係，應急存款應該同普通存款分開，而且個金額要夠你同屋企人使一排，所以目標大約係儲到自己月薪3倍左右。

3. 精明投資

升級到第三層，代表你已經可以用自動波做晒「安全保障」嗰層所講既種種習慣。而喺呢層最重要既就係喺工作上更上一層樓，甚至自己創業，令到自己財務更加獨立。不過，要記得你重係要以收支平衡為首要任務，而且永遠都係要保障到自己既基本生活先，所以要小心任何高風險既決定。

想增加自己既收入？就要學識投資，唔好淨係將啲錢放埋一邊唔用。你可以由細啲既項目開始，搵啲相對穩定同安全少少既商品期課同外幣，作出投資。同時，留意唔同財經趨勢都好重要！例如通脹或者財經大事咁，一定會影響到你既購買力，所以要小心對付。

4. 財務穩健

如果你黎到第四層，恭喜你！呢個可以話係財務無憂既里程碑！可能有好多人都以為你要好似李嘉誠咁先可以黎到個階段，但咁諗就錯啦！只要你有一個穩定既現金流，同埋有足夠存款去應付退休生活，就可以架啦。喺呢個時候，你應該都同時開始喺投資方面賺到唔少收入。

記住！你行到黎呢一步唔代表你可以開始亂使錢，將之前既努力毀於一旦。

－－－

如果你喺2015年既新年目標係想學多啲理財知識既話，希望 理財金字塔：4步邁向財富與成功 可以幫到你達到長期財務穩健。

想拎多啲理財／金融貼士同建議？記得留意MoneyHero Blog。同時，你都可以用我地既網上比較工具，搵出最抵既信用卡、私人貸款、醫療保險、旅遊保險等等⋯