美食博覽 2016正式開鑼，2位為食小編親身去到現場，為大家搜羅各種美食優惠！雖然鬥快搶嘅「1蚊優惠」可能已經冇晒，不過好多人人有份嘅優惠一樣好吸引！而家就等MoneyHero.com.hk同大家逐一介紹！
1）真滋味：瑤柱XO醬$100 / 4罐 （攤位：1C-A32）
小編由細食到大嘅XO醬，優惠大放送！瑤柱XO醬夠晒惹味，用嚟撈飯或者撈麵，味道一絕。全場都有幾檔賣XO醬，不過要數最抵買、最多款式，就應該係呢個攤位。滋味價：4罐只售$100 。超過8款味道，有辣有唔辣，任君選擇。
2）出前一丁：$100旅行袋套裝（攤位：1D-B02）
今年出前一丁喺美食博覽大放異彩，分別推出福袋以及旅行袋套裝。出前一丁福袋套裝一共9款味道，每一袋都附送一個變色杯，只要沖熱水落個杯度，就會變色；一袋只售$70。另外，出前一丁旅行袋套裝內一共有15款味道，優惠價$100。
3）唐龍有限公司：經典爆炸糖 & 杯裝棉花糖（攤位：1C-C33）
爆炸糖，相信係大部分90後讀小學或者80後讀中學嘅小息必食零食。爆炸糖一放落口就立即同唾液產生化學作用，引發一連串嘅爆炸，大家都會從中得到味覺刺激，成班人柴娃娃一齊爆炸，自然樂趣多。呢檔有優惠，$15就有2包爆炸糖。如果大家想試新式食法，可以買埋棉花糖（$10蚊一盒有3杯），將爆炸糖撈堆落去一杯杯嘅棉花糖中，撈勻就可以食。兩款糖一齊買，$30就有2包爆炸糖、2包棉花糖。
4）熊井：日本美食大集合（攤位：1C-D02）
小編一入場就被熊井嘅布置吸引埋去，真係一個字：靚！不過其實唔止得個殼，賣嘅嘢都相當之有質素，價錢亦划算。推介大家可以幫襯呢個「保溫車套餐」，超過10款日本美食（包括：拉麵、烏冬、水餃、仿蟹柳、湯圓、炒飯等等）、仲會送一個保溫手推車俾大家護送啲嘢食返屋企，成個套裝只售$280。
5）天祿洋酒國際有限公司：日本山梨縣特產果汁酒（攤位：1C-A28）
日本山梨縣季節限定嘅水果酒，酒精濃度只有3%，3種可口味道，包括：水蜜桃、士多啤梨、巨峰提子。咁高質，咁特別嘅酒，都大特賣！$100有4支。另外，同樣來自日本嘅果酒，係第一批運到香港，酒精濃度高少少，有5%。味道方面同樣有3款，包括：青蘋果、青檸、柚子。鍾意飲下酒嘅朋友不妨一試！
6）企豪發展有限公司：You.C1000 $40/6樽（攤位：1B-C31）
市面上有隻維他命果汁飲品叫「You.C1000」，唔係太多人識，不過小編試飲完覺得超好味，大力推薦！You.C1000有蘋果味、橙味同檸檬味，一樽包含人體一日所需嘅維他命C、B3、E、B1。平時超市約售$10/樽，美食展只售$40/6樽，平均只係每樽$6.7！健康又好味，正！
7）KOFCO：勁抵辛辣麵（攤位：1D-B10）
辛辣麵同埋其他農心拉麵一向喺香港大受歡迎。平時超市賣開廿幾蚊Pack（5包裝），美食展只賣$70/4 Pack，平均每Pack只係$17.5，鍾意食即食麵嘅朋友係時候入貨！
8）老饕食品行：發光藍莓梳打特飲（攤位：1D-C28）
老饕食品行嘅攤位有賣好多特色小食，其中小編覺得最吸引嘅就係「藍莓雜果梳打」同埋「奇異果＋蘋果沙冰」，因為飲完之後仲可以拎埋隻發光玻璃杯返屋企！拎隻杯嚟得閒泡製下特飲，真係賞心悅目。一杯只售$40，又唔貴喎！
9）永富樂貿易有限公司：西式招牌美食買5送2（攤位：1B-A14）
經典西式美食：意粉同意大利飯相信係唔少人嘅至愛，不過成日出街食又好貴，咁不如自己煮吧？永富樂嘅速食意粉同意大利飯，有齊配料，廚藝白痴都可以煮得好味，原價$22/包，美食展做緊買5送2優惠，平均每包只係$15.7，以呢種質素嚟講算幾平！
10）億中洋行有限公司：多種西式食品大優惠（攤位：1D-B32）
西式美食又點止意粉同飯？億中洋行嘅湯同薯蓉就做緊大特價。英國尊濃紅椒番茄西湯$10就有2罐，美國艾達薯蓉$20就可以買到2件。另外，德國酒心朱古力買2盒只需要$50。
相關閱讀：【Food Expo】2016 美食博覽 必搶1蚊優惠
相關閱讀：早去早搶！2016 電腦節 5大限量優惠
——
延伸閱讀：信用卡 本月精選優惠（2016年8月）
延伸閱讀：【唔使搵代購】日本樂天 + Amazon JP 網購 全攻略
想知道最新嘅理財貼士，就要留意MoneyHero.com.hk Blog，同埋緊貼我哋嘅Facebook Page！
回到文章
