近年愈來愈多人選擇去海外拍攝婚紗，除咗貪外地有更多靚景外，又可以順便去旅行。不過原來 海外婚紗攝影 Package無論係交通、住宿同禮服安排上都有好多魔鬼細節，一個唔覺意好易中伏，搞到荷包大出血。想知揀海外婚攝Package時有乜伏位要注意，等MoneyHero.com.hk同婚禮專家話你知！
結婚資訊媒體「新婚生活易」今年5月同旅遊網站hutchgo.com公布《海外婚紗攝影消費調查》結果，發現高達7成新人會選擇外地拍婚照，其中8成新人會請婚攝公司拍海外婚照，平均開支則為$23,971。台灣、韓國同日本都係最受歡迎嘅拍攝地點，其中以台灣嘅Package最平，平均使費連$10,000都唔使。至於去歐洲國家則至少要使$25,000以上。值得留意嘅係，有關數據係根據海外婚攝公司嘅報價計算出嚟嘅，通常海外婚攝Package係唔包準新人嘅機票同酒店住宿，所以計劃去海外影婚照記得要預留Budget。
籌備結婚除咗影婚紗相仲要攞酒、租借婚紗、度蜜月……加加埋埋至少要30萬？想知更多，即睇：【 結婚 要幾多錢？】籌備結婚的開支預算2016
海外婚攝3大中伏位
各位準新人見去韓國台灣拍婚照2萬已有找，係咪都有啲心郁郁想影番輯呢？不過唔小心選擇海外婚紗攝影Package嘅話好容易中伏，專業旅運婚禮品牌「Take My Hand」嘅專家就教大家留意以下3大中伏位：
1. 未經許可拍攝
原來去海外某些旅遊景點同私人影點（如日本同歐洲嘅教堂）拍攝需要事先申請，而且要付款。沖繩度假婚禮協會早幾月就公布，嚴禁外國攝影師喺未經許可下於當地熱門嘅觀光景點同公共設施拍攝婚照。不過由於手續繁複，成本又高，部分婚攝公司唔會事前申請，一旦被發現，就有機會要按當地匯率價錢支付款項，甚至要準新人承擔。早前就有攝影公司，因為喺未經許可下到希臘一處私人地方拍照時被充公器材，令拍攝過程大受影響。
2. Package唔係樣樣包
部分Package看似集攝影、化妝同婚紗於一身，但可能唔包相簿同油畫，部分包相簿嘅Package就只係包內頁，但不包封面、封底、底片，所以新人一定要Check清楚內容。「Take My Hand」專家又指，如果去韓國影樓（Studio）影婚紗相，一般韓國婚紗相簿嘅設計都係以Studio指定嘅封面同封底，如果客人一定要有特別嘅封面同封底，又會衍生出另一筆費用。如果Package唔包原檔相片檔，咁你就要按每張照片計俾番錢攝影師至可以拎番原檔。
3. 隱藏收費多多
每間婚禮婚禮公司都有唔同嘅Package，服務內容同條款花多眼亂，新人好易誤墮加錢陷阱。準新人到海外拍攝婚紗照，唔單止要支付自己嘅住宿同機票費用，仲要留意Package包唔包工作人員嘅食宿同交通費用。有時選用指定攝影師同化妝師、修圖、超時拍攝、周末周日拍攝都會有附加收費。你甚至可能要俾埋租車費、停車場費、景區門票、租用場地和攝影道員嘅費用添！
海外婚紗攝影慳錢6招
1. 嚴選有口碑嘅海外婚攝公司
多做Research，揀海外婚攝服務時不妨參考親友同網上其他用家嘅意見，選擇口碑同信譽良好嘅海外婚攝公司，服務質素較有保證。
2. 問清楚收費
有時海外婚攝Package會以優惠價推廣吸客，但可能唔包好多細項服務，例如照片原檔、拍攝團隊嘅住宿同交通費又或者超時額外收費。事先問清楚收費就冇咁易Over Budget啦！
3. 口頭承諾要白紙黑字寫低
有時婚攝公司會喺推銷Package時作出種種承諾，但最後卻冇兌現，所以簽約時一定要睇清楚合約，同時亦應要求推銷員將有關承諾寫番喺單據或合約上。如果對方不肯喺單據上列明，可自己列明詳情，再透過電郵將相關資料交俾公司確認，咁起碼有書面證明，有事時唔使口同鼻拗。
4. 同攝影師、造型師事前溝通好
去得海外拍婚照就係想留個美好回憶，但如果照片效果不盡人意，個Package幾平幾抵都冇用。新人應向攝影師講清楚拍攝要求，甚至不妨提供照片樣本俾攝影師參考，亦可以要求公司於拍攝時提供檢視照片嘅工具。
5. 留意取消行程或延期按排
落訂後準新人有可能因為私人理由、惡劣天氣或服務商嘅緣故而被逼改變或取消行程。如果新人因事故更改行桯，有些公司會收取行政費。如果因為天災或惡劣天氣而要退款或者轉去其他地區拍攝，記得要向商戶查詢，例如費用有冇得全數退回，或者最快幾時可以復拍。
6. 揀啱信用卡賺優惠獎賞
無論你最終決定留喺香港影婚紗相定去外地影，使費都唔少，不如準備定幾張信用卡用嚟賺現金回贈同飛行里數，可以兌換折扣優惠、精選禮品甚至免費機票，計落可以慳番唔少！立即睇埋：【結婚可賺好多里數？】 結婚 儲里數必備信用卡2016，揾出最啱你心水嘅信用卡啦！
温馨提示：出國影靚相之餘，記得買埋旅遊保險，保障自己！萬一遇正颱風暴雨被逼取消行程，就可以減少金錢損失！即上我哋嘅比較平台選擇最適合你嘅旅遊保險！有Allied World、FWD同MSIG等不同計劃俾你揀，經我哋買仲有優惠添！或可即按此，了解更多不同公司的旅遊保險產品。
——
延伸閱讀：【旅遊攻略】出外旅遊7大 防盜 措施
延伸閱讀：颱風 暴雨 班機延誤 ，旅遊保險有得賠？
想知道最新嘅理財貼士，就要留意 MoneyHero.com.hk Blog！同埋緊貼我哋嘅 Facebook Page！
回到文章
