Uber 事件令用家人心惶惶，有用開 Uber 嘅用家，仲敢唔敢叫車，想叫嘅時候，車量又有無之前咁充足？早前警方高調拉人，但仲有司機睇錢份上，冒著犯法危險繼續開工，對用家好似無影響，但其實好多用家都對 Uber 有好多疑問，MoneyHero 整理咗4大常見 Uber 用家迷思，睇下幫唔幫大家解開疑團，順便睇埋Uber優惠啦！
Uber 車當然有買第三者保險，但……
喺香港道路上行駛嘅汽車，都要買第三者保險，否則犯法。 Uber 車輛當然係有買第三者保險啦，但有買唔代表出事時有得賠。因為如果車輛被用作不合法用途，包括非法營運，第三者保險就唔一定提供保障。
但大家記住，唔一定，又唔代表一定冇。消委會總幹事黃鳯嫺都只係話乘客遇意外「未必受第三者保險保障，須清楚衡量風險」。
而另一方面，一般私家車保險嘅保障事項都唔包括載客取酬，但你同 Uber 司機嘅關係到底係客人同司機，定係朋友呢？喺冇現金交易嘅情況下，就十分微妙了……
第三者保險失效，代表乘客出意外冇得賠？
原則上， Uber 車輛都有買第三者責任保險，但假設保險失效，司機就會上身，從而進入複雜嘅索償程序。而司機就算要賠，都有可能申請破產或賠唔足錢。又，唔好以為只要你唔叫 Uber 車就唔關事， Uber 車在街上行走，如果你真係唔好彩畀佢撞傷，有可能面對無第三者責任保險嘅狀況！
所以，最理想嘅做法，都係自己安排好自己嘅意外保險，萬一出了意外，都可以先從意外保險拿取應急用嘅金錢，之後再慢慢與司機進入索償程序，咁樣就有更全面嘅保障喇。
到底 Uber 有無買保險？
Uber 一直表示自己有為所有乘客購買保險，不過由於香港未有案例，難以斷言保險在香港嘅賠償狀況。而如果你仲想做 Uber 司機，你就要知道，喺美國有案例，係裁定 Uber 司機係 Uber 嘅僱員，而唔係服務承包商。喺香港，出咗事，你係僱員定服務承包商，好影響你嘅權益；乘客出咗意外，你有可能要自己傾家蕩產賠償，要小心考慮自己願唔願意承受呢個風險。
點解冇保險公司提供一份適合 Uber 車輛嘅第三者保險？
保險係會隨著時代進步嘅行業，隨著社會有唔同嘅需求，有人希望分散風險，只要市場夠大，操作可行，相關嘅保險就會應運而生。 Uber 係一間市值直逼Facebook嘅公司，喺全世界都有服務，咁大嘅市場，點解冇保險公司為 Uber 司機度身訂造第三者保險？
其中一個原因，就係世界各地保險公司，都要根據當地情況，評估風險，調整服務。 Uber 作為新興服務，其風險難以評估，所以都未咁快有適合嘅保險提供。
第二點，就係難以界定 Uber 車輛嘅狀態。 Uber 車輛好多時只係普通私家車，而私家車同載客車嘅風險差好遠，保費亦有不同。到底 Uber 車輛幾時先係載客車？係有客人嘅時候、前往接客途中、按緊Apps接客時，定閒置時都係載客車？呢啲好有可能係 Uber 同保險公司要討論嘅細節。另一方面，保險公司要點樣配合科技數據，分析風險同行為模式，亦係未來保險公司將要面對嘅挑戰。
想知道最新嘅理財貼士，就要留意 MoneyHero Blog，同埋緊貼我哋嘅 Facebook Page！
——
延伸閱讀：【交通意外及賠償】和解前你要知的保險知識 切勿輕易賠償！
回到文章
