近年全球旅遊業持續發展，根據世界旅遊組織發表既世界旅遊景氣報告，亞太區於2014年錄得5%增長率，屬於全球第二高。根據一份最新報告（只有英文版），過去一年亞太區既國際旅客達到2億6300萬。日本同韓國既旅客到訪量增加左7%，而東南亞既旅客到訪量就增加左2%。廉價航空既數目亦都反映呢股旅遊趨勢。但隨住廉價航空數目暴增，亞洲航空界既競爭亦越來越激烈。
根據亞洲太平洋航空中心既數據，宜家喺亞太區總共有47間廉價航空公司，喺不久既將來，重可以會再有12間公司加入。廉價航空宜家已經總共佔左東南亞60％既機位（詳情），間接對一啲大型既航空公司（例如泰國國際航空、加魯達印尼航空，與及菲律賓航空）造成壓力。
但近來既空難事件搞到人心惶惶，唔少旅客都重新考慮坐飛機時候既人身安全。例如好受歡迎既廉航Air Asia自從QZ8501班機喺印尼失事之後，唔少人開始懷疑廉價航空既安全準則疑似比較寬鬆，係咪為左慳錢。另一間受到關注既航空公司——台灣既復興航空，就喺七個月之內共有兩架客機（航班GE235及GE222 ）失事。
雖然有人擔心廉價航空係咪安全，但唔好忘記：唔係淨係廉航先會發生意外！因為連馬來西亞既國家航空公司——馬來西亞航空，喺舊年都有兩班機失事（航班MH370同埋MH17），令全球震驚，重成為左好多日既頭條。
更重要既係，乘客必須要記住，呢啲不幸既意外唔等於坐飛機係唔安全。喺數據上黎睇，飛機依然係其中一種最安全既交通工具，坐車甚至比坐飛機更危險！加上科技日新月異，飛行技術亦都一日一日咁進步緊，令到飛行更加安全。
除此之外，廉航其實反而有更大既動機去維持嚴格既安全規則，佢地都唔想公司執笠架嘛！想比起其他大型航空公司，廉航既「資歷」都比較淺，所以要更加努力去打響名堂，開拓客路同埋留住顧客。事實上，一啲慳錢既方法，例如成個航空公司都用同一型號既客機，反而增加左整體安全度，同埋令乘客坐得更舒服（詳情）。
如果你都重係有啲怕坐廉航，可以喺買飛之前參考一下唔同國際組織（例如美國聯邦航空管理局）對不同航空公司作出既評分，同埋安全等級（詳情）。你亦都可以針對打算坐既航空公司，做下資料搜集，例如取消或者改機票易唔易、機隊既平均機齡、有冇同其他較大型同信譽良好既航空公司合作營運航班等等⋯
當然，亦要查清楚航空公司有冇比人放過落黑名單，同埋有冇任何媒體介紹過呢間航空公司，如果冇人討論過既話，就要小心啲啦！
喺空難之後，航空公司要令乘客重拾信心唔係一件易事。不過，就廉價航空黎講，低成本唔係必定等於低質素同唔安全（詳情）。但無論點都好，唔怕一萬最怕萬一，所以你都應該盡量選擇比較可信既航空公司，同埋購買一份全面既旅遊保險，以保障自己安全。
----
延伸閱讀：遇上空難時，10招增加存活率！
即上MoneyHero.com.hk，瀏覽更多金融產品（例如醫療保險、信用卡）有關既資料！想知多啲慳錢貼士同理財建議，就要留意MoneyHero blog，同埋緊貼MoneyHero facebook page!
回到文章
