後減息時代！3-5%活期存款計劃一覽！讓你每分每秒都享受高息活期存款計劃，你的存款利率只有0.375%嗎？

你的存款利率只有0.375%嗎？

你有冇管理好你嘅銀行存款？你而家嘅存款利息係幾多？你係咪收緊基本活期存款利率0.375%啊？存款除咗就咁擺喺度做活期，當然仲有定期存款，都可以賺取一啲接近零風險嘅回報。其實近年仲興起一啲高息存款計劃，佢哋嘅利率可以媲美定期存款，甚至俾定期利率更高！而且提早走，仲唔會有任何懲罰，仲可以拎到存款期間嘅利息。現時市面上有好多銀行都有一啲高息嘅活期存款計劃，即刻同大家睇吓啦！ 

注意：以下所提及嘅高息存款計劃都係受銀行存戶存款保障，唔係一啲古靈精怪投資產品。

圖片來源：香港存款保障委員會

靈活信銀大富翁及渣打馬拉松存款 

現時市面上主流有幾間銀行都有做相類似嘅高息(半)活期存款計劃。點解係半？因為未真係可以做到做活期出出入入都得。不過就可以隨時轉走啲錢。信銀國際嘅大富翁存款同渣打銀行嘅馬拉松存款，呢兩間銀行嘅活期計劃嘅利率就做得比較高，仲可以貼近到同三個月嘅定期利率。高息存款計劃一般維持喺三至五個月左右，初初頭一兩個月利率會比較低，然後就會逐步提升。如果策略性擺足全期，拉勻嚟講就會同三個月嘅定期利率差唔多！與其將多餘資金放喺一間低息嘅銀行，點解唔放喺馬拉松存款或者大富翁存款呢？你想攞啲錢應急嗰陣亦都可以隨時提款唔會有任何懲罰，仲會俾返之前嘅利息你。

擊破每個任務 利率逐步提升 

以上兩款高息活期存款計劃都唔使做啲咩任務，基本上你登記咗，然後存款就可以收到相對應嘅利率。另外一款高息活期係銀行希望你多啲使用佢地嘅服務，銀行會設定各種唔同嘅任務。當完成每個任務之後你嘅存款利率就會提升！譬如值得留意嘅就有大新360°易出糧服務、星展e$aver存款推廣、渣打旗下虛擬銀行Mox新資金推廣計劃、眾安銀行ZA Bank嘅「錢罌」計劃！只要你完成銀行設定嘅各式各樣嘅任務，你嘅活期年利率會提升至一個可觀嘅利率！活期利率做到3%或以上，甚至高達5%都絕對唔係冇可能㗎！當然唔同嘅計劃有唔同嘅玩法啦，相信有跟進開蛋黃嘅朋友，都知道蛋黃網誌一步一步教埋大家。如果大家有興趣了解更多，完成任務嘅技巧都可以私訊蛋黃！ 

(高息活期存款計劃比較)

學會管理銀行存款 實行躺着賺 

高息活期存款計劃有唔同嘅形式，總有一款啱你嘅！這些計劃都並非只係有錢人嘅專利，小資族一樣可以參與，低至一萬蚊就可以起步架啦。真係千祈唔好就咁放喺銀行賺取現時銀行嘅基本利率0.375%。由今天開始，學會管理你嘅存款，咁你就可以躺着日日賺，每天瞓醒都會可以見到銀行戶口存款有增長。

----------

借定唔借？還得到先好借！

作者盡量確保以上資料準確，若任何資料與你到訪的金融機構、服務供應商或特定產品網站有所出入，所有金融產品和服務均以金融機構的版本為準，使用該服務前請參閱相關金融機構網站的最更新版本之產品資訊及條款細則。如資料有誤，歡迎指正。

本文件中如有類似前瞻性陳述之內容，此等內容或陳述不得視為對任何將來表現之保證，且應注意實際情況或發展可能與該等陳述有重大落差。