[躺平]銀色債券2024認購資料、申請日期、攻略、提早贖回全面睇，合理推算抽25手！

躺平賺錢，點會冇銀色債券份？一年一度嘅銀債又發行。今年2024已經係去到第九批啦，符合資格嘅人記得一定要認購，真係政府派錢落你袋。亦都唔似iBond、綠色債券，銀債絕對係比定期更好嘅投資產品。

銀色債券2024 – 基本資料

2024年度銀債將會喺2024年9月30日開始俾大家認購，認購期去到10月14日，今次發行額度基本有500億，會視乎認購反應加碼至高達550億。利率與香港通脹率掛鉤，或者最少有四厘(新聞稿)。在美國減息嘅大環境下，四厘比普遍而家定期存款利率算係高（特別係大行）。如果想啲錢繼續擺喺大個幾間銀行，咁銀債就可以幫到你。只要你持有香港身份證同埋喺2025年就年滿60歲（即1965年或之前出世），你就係合資格認構人士。不過我相信好多讀者都未有，但你有阿爸阿媽嘅人頭，不防積極考慮。收息日期同相關資料可以睇呢到 (30/9會見到)。

圖片來源：政府新聞處

基本工程儲備基金？同以往有啲咩分別？

本批銀色債券乃基礎建設債券計劃下的零售部分。發債所得資金將撥入基本工程儲備基金，按計劃框架作基建項目投資，目的係讓市民對推動香港長遠發展的基建項目有更大的『參與感』和『獲得感』。哦。其實用嚟做乜也不是大家最關心，只要政府到期時有能力贖回就可以。國際三大評級機構對港府嘅長期信貸評級都是高評級嘅投資級別債，因些投資風險低。

點解要買銀債？穩定可靠隨時甩手

正正就係因為銀債同以往發行嘅iBond、綠債唔同。銀債沒有二手市場，唔會有報價。因為如果你突然之間急需用錢週轉，又或者坊間嘅定期利率，升到10厘咁高，你可以將銀債隨時贖回套現，做你想做嘅嘢，政府係用原價同你收返！仲要係計埋利息俾你！絕對係可以輸打贏要，唔會因市場變化而錯過咗任何機會。你走去做定期都無咁靈活啦。呢一刻冇資金需要、又嫌定期利率低、高息活期又要做任務咁煩，倒不如就認購銀債啦！

究竟銀債抽幾多手？合理推算抽25手！

基本上銀債係無乜風險。除非你覺得政府無能力贖回你嘅債券！其實銀行都會倒閉啦，唔通又定期安全過銀債？唔係喎，香港有50萬存款保障，車，咪又係政府保你。所以如果有機會抽更係拎到盡啦！以下係簡單粗略亂咁估系列：

• 發行額同上年2023年一樣，合資格人數再多左10萬。不過可能D人已經將大部分身家放左係之前嘅銀債(如果資金不足又認購左2022年個啲銀債，其實可以沽舊債換新債，抵稔的)；又可能有啲覺得4厘回報算吸引唔再繼續買。
• 按過往數據來看估計大約有14%合資格人士，今年有240萬合資格人算，即約35萬人認購。假設每人都拎到盡就最多可以有16手，但回顧過往都唔係人人都會認購最多的數量，調整後推算今年可獲20-22手。
• 回顧返2023年最終發行額加碼至550億，認購結果最少穩獲22手。
• 亂咁地推斷今年2024年銀債抽25手都應該係幾合理。加油！

----------

借定唔借？還得到先好借！

作者盡量確保以上資料準確，若任何資料與你到訪的金融機構、服務供應商或特定產品網站有所出入，所有金融產品和服務均以金融機構的版本為準，使用該服務前請參閱相關金融機構網站的最更新版本之產品資訊及條款細則。如資料有誤，歡迎指正。

本文件中如有類似前瞻性陳述之內容，此等內容或陳述不得視為對任何將來表現之保證，且應注意實際情況或發展可能與該等陳述有重大落差。