2024年10月份高息活期存款比較 (建行亞洲、渣打、中信銀行國際)

>現時一般港元活期儲蓄存款利率已調整至0.625厘！渣打放150萬送迪士尼自助晚餐！

高息活期存款咩玩法？定期存款定活期存款好？

高息活期存款係有部份定期嘅概念元素喺度，因為佢哋嘅計劃通常係頭嗰一兩個月係比較低息，最後一個月高息，拉勻黎計，令到平均利率可以同三個月嘅定期存款利率差唔多。活期顧名思義就係佢哋可以隨時提早攞錢走。利息佢哋係每日計算，每月月尾會派一次。下面會同大家做一個活期存款比較！

2024 已經過左一大半了，一如市場預期九月份減息，一減仲要減左0.5%，中長期定期利率已進一步下降。既然中長期利率都無短期利率咁高，不如考慮做以下嘅存款計劃！一般做定期存款會犧牲咗資金嘅流動性。同埋，如果好似九月尾股市狂牛式上升，你舊錢做晒定期，冇流動資金就有得睇無得食。所以我一般都係會主張做高息活期。高息活期息率一點也不比定期輸蝕。

依家市面上相類似計劃有三間主流銀行有提供，分別係渣打、建行亞洲及中信銀行國際。渣打叫高息馬拉松存款，建行亞洲叫月月增息，而信銀國際叫大富翁存款/中信大富翁。一般我哋開立呢啲存款都會喺月底開始做，咁樣就可以縮短存款期令到成個計劃嘅利率拉勻係最高。

每個計劃夠竟收到幾多息？即睇活期存款比較！

以下個圖表粗略地幫大家比較同計算咗2024 年10 月份嘅高息活期存款計劃。今個月利率再有一個輕微跌幅了。不過信銀又KEEP到喺一個算係理想水平喎，平均有3.49厘左右。美國落實減息，美債/iBond [TLT現價] 個啲個價已在高位橫行！趁息口還算是滿意嘅日子要好好把握，今個月信銀國際嘅大富翁存款看來仍是較優勝。注意：如果年尾再減一次息嘅話，活期存款息率調整會影響大富翁利率，整體會再下降啲。渣打馬拉松存款因推廣利率是固定的則不受影響。建行亞洲十月中更新，全期得返三個月，同其他兩間同步了。

假設未來幾個月市場利率不變，主流三間高息活期存款同現時三個月嘅定期存款利率差唔多。以大富翁存款於月底開立計算為例，可以有大約3.49 厘左右！渣打馬拉松有3.21%，建行亞洲只有約1.83 厘。幸好，呢啲計劃活期利率都仲係比早幾年嘅Mortgage-Linked Account 更高。以下計算按現時推出的利率作比較。

 

(註：約三個月，實際日期需參考官方網頁)

以每10 萬存款計款，中信大富翁只要由10 月30 日起計擺94日左右就可以得到大約最高嘅$897利息。不過如果擺一兩個月，短期利率，渣打馬拉松都仲係最好。渣打呢方面真係幾好，佢幾期個利率相對平均，又唔洗做任務已經3.0-3.2%，無左Mox嘅3厘活期依家仲有馬拉松！非常適合短打！短期除左可以考慮渣打之外，Citi 一個月定存息率一直出哂名高，也可以納入考慮。以上圖表全部以現有客戶計算，唔洗驚你無份。今期渣打馬拉松或信銀大富翁都值得考慮！

> Mox Bank 嘅活期存款基本年利率已調整至係1% – 1.25%，做一個任務就可以額外多1.25%年利率，加埋就有高達2.5%啦！是真活期。可以自由出入。上限為HKD3,000,000 內的港元存款。

全部都要新資金，哪裏來的新資金？

要有新資金，首先我哋要知道每間銀行最新資金嘅定義。如果清楚了解，你同一舊錢幾時都係新資金！

• 渣打：開立指定戶口當日及前4 個工作天結餘對比。
  解說：即係如果你用渣打的話，只需要將現有資金轉走去第二間銀行大
  約一星期，再次存入就係新資金啦 (其實即走即入都得，試下就知架啦)。

• 信銀國際：與上個月最後一日嘅工作日嘅結餘對比。
  解說：信銀國際嘅話只要你喺每月嘅最後一個工作日都Keep 住銀行結
  餘係$0，你喺下個月入嘅每一蚊都係新資金。

• 建行亞洲：無清楚列明新資金要求

注意：
提提大家參加中信大富翁後記得係要放錢係相應嘅戶口，有啲人可能有幾個戶口，登記後係App 個到會見到有寫住邊個係『大富翁存款』/『加碼大富翁存款』戶口。中信條款及細則註明截止登記日期時間係截止當日下午8 點！唔好做Deadline Fighter。最後大家可以去呢度睇吓依家嘅定期存款利率究竟抵唔抵做啦！不過我自己都係鍾意活期多啲，起碼賺左流性丫嗎。

官方推廣頁面：建行「月月增息儲蓄戶口」、渣打高息馬拉松活期存款、中信「大富翁存款」
最新條款及細則：渣打、建行亞洲及信銀國際

過往月份的利率資料

同場保留往月的高息活期存款利率走勢及比較。

----------

借定唔借？還得到先好借！

作者盡量確保以上資料準確，若任何資料與你到訪的金融機構、服務供應商或特定產品網站有所出入，所有金融產品和服務均以金融機構的版本為準，使用該服務前請參閱相關金融機構網站的最更新版本之產品資訊及條款細則。如資料有誤，歡迎指正。

本文件中如有類似前瞻性陳述之內容，此等內容或陳述不得視為對任何將來表現之保證，且應注意實際情況或發展可能與該等陳述有重大落差。