一提起聖誕同埋新年，相信大家都會諗起一連串既慶祝活動，同埋越黎越縮水既荷包。加上大時大節，四圍都人迫迫，搞到成個12月變左唔係有節日氣氛，而係麻煩。如果想慶祝得黎，又唔會使凸左，就要睇下我地既聖誕新年慳錢13招！

1. DIY禮物

如果你有美術天份，唔使怕SHOW出黎！你可以就住收禮物既人既個人喜好，同埋今季興既野，整啲手作仔當禮物。如果你整野食叻既，就可以焗野食送比人。例如送朱克力brownie比鍾意朱古力既朋友；織頂帽或者頸巾比屋企人；甚至作首歌比你既另一半都得架！

2. 送有紀念價值既野

好似DIY禮物咁，一啲有紀念價值既野，都好適合送比屋企人或者識左好耐既朋友。你可以買本靚既相簿或者剪貼簿，入面貼滿晒相，紀錄低一啲有紀念價值既事或者經歷。想再顯得度身訂造一啲，重可以加啲貼紙做裝修，同埋寫啲標題喺啲相下面添！

3.　非物質既禮物

如果你唔想節日變成咁物質主義，送啲通俗禮物既話，可以考慮下用做善事黎代替。你可以用朋友既名義，捐錢比佢鍾意既慈善機構。如果屋企人/朋友有啲野想做好耐都未做到，例如執屋咁，你可以幫佢地做左佢，代替買禮物。又或者你知道佢地想試下新野，可以幫佢地報啲煮野食，art jamming或者跳舞班，甚至教佢地一樣你好叻既野，都可以係一份禮物黎架。重要既係，揀一樣收禮物人會鍾意既、有價值既經驗，黎代替物質上既禮物。

4. 慎選收禮人

除非你係聖誕老人啦，如果唔係既話，送禮物比每個人唔係你既責任！所以你既送禮名單唔應該太長，如果因為買禮物搞到自己好大壓力就唔好啦。其實只要送比家人伴侶、最熟既朋友或者你真係尊敬既人，就夠架啦。

5. 用布料代替花紙

每年包禮物都要用好多花紙，但一拆禮物之後又即刻送佢地入堆填區。所以為左避免浪費，可以用一個比較實用既包禮物方法：用布料做花紙！例如日本和風便當布，甚至圖案好靚既毛巾或者枱布，咁拆完禮物又可以用返呀嘛。想包到份禮物靚靚，可以參考日本風呂敷既包野方法，用一塊正方形既布，好似摺紙咁，就可以包出優雅既感覺！

6. 用報紙代替花紙

如果你都係比較鍾意傳統啲既包禮物方法，可以喺屋企或者公司搵啲另類既花紙。宜家出面賣緊好多花紙都有仿報紙既設計，咁點解唔真係搵啲舊報紙、商品目錄、或者雜誌紙，黎做花紙？配合一個適合既蝴蝶結或者圖案，咁就夠晒靚啦。如果份禮物係比小朋友既話，可以搵有彩色漫畫既報紙雜誌，如果朋友係偽文青既話，搵一頁全部都係英文字，充滿書卷味既報紙做花紙就啱晒啦。

7. 多用E-CARD

以前可能每到聖誕就要買一盒又一盒既聖誕卡同郵票，但宜家上網就可以搵到好多好靚既E-CARD，用EMAIL或者FACEBOOK寄比屋企人/朋友就得啦。你識最基本既PHOTOSHOP技巧既話，重可以整到一張獨一無二，買都買唔到既卡添。

8. 計劃好點用年尾BONUS

如果你年尾有雙糧或者BONUS，唔好咁心急用晒佢黎買自己想要既野住！試下儲起其中一部份，用黎幫你達成買車或者買樓呢啲長期既目標。留底你覺得夠既錢之後，就可以將淨底既錢分配去日常支出，或者買想要既野。

9. 用已經有既飾物裝飾屋企

喺你買新既聖誕裝飾之前，記得睇下已經有嗰啲飾物用唔用得返先。你可以將唔同季度既飾物Mix&match埋一齊，只要保持到簡單同埋有品味就OK。如果你有小朋友既話，可以試下用佢地既小玩具黎裝飾聖誕樹，都不失為一個有創意又搞怪既裝飾。

10. 簡化party食物準備

無論係家庭聚會又好，office party都好，每個人自携一樣野食／野飲，係最易準備PARTY餐飲既方法。喺開party之前同參加者傾好每人帶啲咩野食，咁就可以避免大家都拎同一樣野食，或者拎晒甜品，搞到冇主菜既情況發生。

11. 簡單party娛樂

好玩既PARTY唔一定要有得唱K，或者有任飲既酒水。視乎參加Party既人，其實有音樂同埋大家講下笑傾下計，都可以好好玩！比較慳錢既活動有比賽唱聖誕歌啦，大家開心SHARE啲喺網上睇到既搞笑野，一齊睇電影（甚至大家都鍾意踩既爛片），都可以令氣氛好好。

12. 預留時間陪屋企人

除左平日返工，陪屋企人，重要搵時間買禮物去PARTY，所以大時大節識得管理時間好重要。預早計劃定幾時去買禮物，去就腳既百貨公司就可以一次過買晒禮物、裝飾同埋PARTY用品。如果你打算離開香港幾日抖下氣，或者用幾日黎陪屋企人，記得要同你既老闆講低你既計劃，避免混亂或者佢突然搵你唔到。

13. 對自己好啲

12月搞左咁多野，好自然會想獎勵下自己。一到年尾，唔少人都會有節日抑鬰症（或者節日綜合症），所以留返啲時間比自己抖下，都好重要架。唔好日日出街去到咁盡，留喺屋企休息下，準備迎接新既一年。只要唔好有太多負面情緒，覺得一個人喺屋企好慘，比啲時間自己獨處，其實都係過節既一個好既選擇。

—————

想知道更多理財資訊？即上MoneyHero Blog，睇下有咩辦法可以喺2015年慳多啲！