「We wish you a Merry Christmas……」而家開始唱 聖誕 歌好似有啲早，但最近大家出外時有無發現，商場都已換上各式 聖誕 佈置呢？為咗吸引人流，商場都各出其招，到底有乜「人物」進駐？去邊度影靚相好？就等MoneyHero.com.hk為你作出精選推介！
1）迪士尼朋友陪你過聖誕：海港城「Happily Ever After」
今年海港城同迪士尼合作，將露天廣場化身「Happily Ever After」聖誕大街和夢幻劇院，講到全場最搶眼的，就是高40呎、以唔同形狀星星組成的聖誕樹拱門！除了大街充滿氣氛的裝置之外，還有3款迪士尼聖誕櫥窗等住你影相添，分別是小朋友的最愛《冰雪奇緣》主題、女仕們喜歡的《Tsum Tsum》慶祝迪士尼10年的主題，以及米奇老鼠同高飛狗齊齊睇故事書的場景。
望一望大街和夢幻劇院，發現上面有一些小窗戶，原來40多位迪士尼朋友仔的剪影會喺嗰度出現，包括米奇、唐老鴨和最新《反轉腦朋友》的角色等等。咁有心思，身為迪士尼Fans的你，點可以唔去呀！只要捐款$30或$50俾「香港血癌基金」，仲可以走入盒子和米奇米妮合照，又或者有傳統剪紙師傅幫你剪一個獨一無二的剪影添，詳情按此查詢。
日期：2015年11月5日至2016年1月3日 開放時間：上午10時至晚上10時
2）杯緣迷朝聖：「The One杯緣子奇幻聖誕派對」
大家喺社交平台有無見過一個OL造型打扮的娃娃，在杯邊做出各種逗趣的動作呢？她就是紅遍社交網絡的「杯緣子」啦。最近佢進駐咗The One，同大家一起渡過聖誕節！展區分別是設於中庭、L2長廊和露天廣場，L2長廊設有「杯緣子香港情懷」主題區，等大家可以和杯緣子一起感受到懷舊冰室杯的感覺；中庭就會有一棵高4米的玻璃杯聖誕樹，每隻杯都有4~5個杯緣子娃娃，整棵「樹」總共有2,500個杯緣子，認真壯觀！至於露天廣場就會設有5個主題的大杯，俾大家同杯緣子影相，最特別的當然就係首個香港限定版「You are The One」啦！詳情按此查詢。
日期：2015年11月11日至2016年1月3日 開放時間：上午10時至晚上10時
＊提提大家：只要在The One用任何電子貨幣，如信用卡、易辦事、銀聯卡和八達通，消費滿指定金額，以最多2張不同商戶之即日機單據，而每張金額必須滿$100，連同其電子貨幣付款存根，就可以免費換領獨家「杯緣子」主題禮品1份或The One $100購物現金券1張。由即日至2016年1月3日，數量有限，送完即止，大家要快手啦！詳情按此查詢。
3）熊大召集開Party：朗豪坊 「Line Friend Party On The Desk」
Line是香港人常用的通訊應用程式之一，大家對一眾Line Friends實唔會覺陌生！最近熊大就拉大隊去到朗豪坊開Party，在4/F通天廣場的位置，設立以文具為主題的樂園，Line Friends同你玩盡鉛筆刨摩天輪、旋轉咖啡杯和膠紙座滑梯等設施！除此以外，設有期間限定的Pop-up Store，買紀念品返屋企同送俾朋友！（詳情按此查詢。）
日期：2015年11月18日至2016年1月3日 開放時間：上午11時至晚上11時
聖誕消費購物，有乜信用卡簽帳優惠？即睇：最新 信用卡優惠 精選（2015年11月）
4）傳說中有個女王在世上：「東港城 x 松本零士聖誕幻想時空」
「傳說中有個女王在世上……」各位70後、80後一定聽過呢句歌詞，講緊的就是出至松本零士手筆的《千年女王》的主題曲。Fans們要留意啦，因為最近東港城將松本老師筆下的科幻宇宙，以1:1 3D打造技術，造成3,000呎的聖誕佈置，除咗「銀河鐵道999」之外，仲有「動感列車」、「愛干達號」和「宇宙觀景亭」等等。同場仲有《松本零士作品回顧展》，包括老師為此活動重新編畫的港版全新作品，仲有20幅的動畫手稿和原稿，實在不能錯過！（詳情按此查詢。）
日期：2015年11月4日至12月27日 開放時間：上午10時至下午10時
5）小朋友必去：「Peppa Pig 皇室堡冬日冰雪樂 」
近期紅爆小朋友界的應該係Peppa Pig！佢係邊個？佢就係學前教育動畫《Peppa Pig》的人物啦，教小朋友唱歌之餘，仲教生字，小朋友梗係鍾意佢啦！今個聖誕，一眾《Peppa Pig》角色就在皇室堡等住各位小朋友！除了可以和佈景影相之外，真正的Peppa Pig仲會現身同小朋友拍照留念，日子暫時未確定，想知記住留意皇室堡Facebook的最新消息啦！小朋友見完Peppa Pig仲可以同爸爸媽媽在全港首間限定的精品店買埋聖誕禮物返屋企添！（詳情按此查詢。）
日期：2015年11月5日至2016年1月10日 開放時間：上午10時至晚上10時
6）自製曲奇工作坊：荷里活廣場「Cookie Run聖誕迷城」
紅遍亞洲的手機遊戲《Cookie Run》由韓國抵達香港，在這個聖誕一眾人物現身鑽石山，以3,000呎的場地，將手機遊戲虛擬背景化成實景，等大家可以同Cookie們影相。如果想玩遊戲的話，可以玩當中的「電子體驗遊戲」，仲有機會贏得指定現金券添！除了有全港首間《Cookie Run》的精品店外，仲可以參加見面會同角色見見面！另外只要家長在一間或者兩間商戶消費滿$300，可以憑當天消費發票為小朋友報名，參加糖衣曲奇餅和Cupcake型手工皂的工作坊！（詳情按此查詢。）
日期：2015年11月20日至2016年1月3日 開放時間：上午10時至晚上10時
7）黑暗裡感受故事：太古廣場「Christmas Wonder with The Little Prince」
萬眾期待的《小王子》電影，將會在平安夜上映，在未有得睇電影之前，不如就先去去太古廣場舉辦的小王子展覽，從中感受下故事。點解小編會咁講？因為在「黑暗中的《小王子》」中，參觀者會被帶入黑暗的隧道裡，以聽朗讀版的《小王子》故事和觸摸故事人物、場景雕塑去了解故事，並明白視覺以外的感受同樣重要。至於「《小王子》藝術品收藏展」就展出了珍貴的電影動畫手稿和多個電影人物造型的雕塑，又點可以唔睇呢？（詳情按此查詢。）
日期：2015年11月25日至2016年1月1日 開放時間：上午10時至晚上10:00時
8）玩具迷注意：「MCP新都城中心 x Mr. Potato Head Lab」
睇過《Toy Story》的朋友仔都一定會識薯蛋先生同太太啦，雖然佢哋唔係故事主角，但都有一大班Fans。各位Fans注意啦！最近MCP新都城中心就邀請咗呢對夫妻喺呢個聖誕節嚟到同大家一齊過！除咗有裝置俾大家影相之外，仲有「薯蛋頭遊戲專區」和「一人一薯製作室」，等大家可以玩添！如果想見薯蛋頭先生一面，Fans們就有機會啦！皆因他會辦2場見面會，先到先得㗎！
日期： 2015年11月16日至2016年1月3日 開放時間：中午12時至晚上10時
＊小編又有溫馨提示，只要在新都城中心消費滿$150或以上，即可於商場G/F禮賓部換領秋日消費賞禮品包1份（包括：沛公甜品千層班戟餅劵1張、健康工房/果汁先生飲品1枝、其他小禮品）。行街行到有少少肚餓，就最啱用啦！禮品數量有限，由即日起至送完即止。
9）歡迎來到姆明谷：新世紀廣場「姆明聖誕『森』度遊」
芬蘭的特色除咗聖誕老人之外，仲有我們熟悉的姆明！無錢飛芬蘭？唔緊要，皆因今個聖誕姆明會拉隊嚟到新世紀廣場，為咗符合香港人影、玩、買的要求，商場亦都設計咗幾個區域嚟迎合大家的需求！首先「影」方面，就設有「姆明森之庭園」，各位拍友可同姆明和歌妮來個親密自拍；商場設有「樹精迷宮陣」和「聖誕『油』花園」，比小朋友同姆明大隊一起玩！至於各位吃貨關心的「食」，就設有全城首賣的「姆明濃情方塊朱古力」和「脆緻姆明馬卡龍」等多款芬蘭和日本限定產品，包有一款啱你！（詳情按此查詢。）
日期：2015年11月26日至2016年1月3日 開放時間：上午10時至下午10時
10）齊慶10歲生日：新都會廣場「The Loft Style Kuromi Hotel」
今年原來係Kuromi的10歲生日呀！聖誕節又就嚟到，雙喜臨門，梗係要賀一賀佢啦！所以新都會廣場就推出全港首間「The Loft Style Kuromi Hotel」，具有工業風的酒店，包括五星級套房和美式桌球等，而Kuromi都會化身不同崗位，同大家一起玩，一起影相！影相之外，當然仲有期間限定商店，俾大家買特色紀念品和聖誕禮物，送俾親朋戚友啦！（詳情按此查詢。）
日期：2015年11月8日至2016年1月3日 開放時間：上午10時至下午10時
聖誕節嚟到，要買禮物俾身邊人？一於用信用卡付款，仲可以嚟儲埋飛行里數。用邊張信用卡最好？即上我哋的信用卡比較平台睇下！
——
延伸閱讀：【白色聖誕】芬蘭尋找 聖誕老人 之旅
想知道最新嘅理財貼士，就要留意 MoneyHero.com.hk Blog，同埋緊貼我哋嘅 Facebook Page！
回到文章
