坊間有不少 投資 貼士，教大家如何小心投資。然而，許多 投資 者依然會行差踏錯，犯下一些大小錯誤，影響自己的 投資 表現，甚至損失慘重。現筆者根據一些投資經驗，歸納出「10大投資誤區」，希望能夠幫到大家留意同避開一啲投資誤區。繼上篇說明了3點後，今次是中篇，請大家繼續籅意下篇。
4）沒有預測力的圖表分析
中學時期，窮小子除咗研究投資亦都好鍾意睇啲超自然科學古靈精怪嘢。記得2008年中國奧運期間，網上流傳一本預言書《推背圖》，能預測中國於北京奧運奪取最多金牌及於2030年成為經濟超級大國。年少無知，表面上看來預測好似幾準同有說服力，但最後發覺《推背圖》其實係自圓其說及「馬後炮」的玩意，十分荒謬。窮小子唔知道2030年中國能否成為經濟超級大國，只知道中國再不改善空氣污染及生態環境問題，相信到2030年中國已經不再適合人類居住。
見到坊間好多投資圖表分析，聲稱可以預測未來恆指/股價升或跌，喺分析時亦會出現好多專業術語如「身懷六甲」、「晨光之星」等等，但道理其實猶如《推背圖》傳言一樣，背後只是自圓其說的理論，根本沒有預測能力！因為圖表上的數據只是歷史數據繪畫而成，筆者唔認為歷史數據能預測下一秒發生乜事, 最有用的功能只係用來參考歷史股價表現而已。
見到好多投資者都利用圖表決定買賣股票及推斷股價走勢，但忽略咗留意公司嘅業務、派息政策及前景, 其實已經跌入咗投資誤區。對於窮小子嚟講，圖表只是輔助工具，本身不具備預測及分析能力，因股價升跌取決於公司的未來盈利表現、派息能力及業務前景，而不是歷史股價表現。
延伸閱讀：給子女最好的：建立 教育基金 的6大要點
5）大行報告的美麗陷阱
留意到好多朋友都好關心大行報告嘅目標價，有時好似好準，股民當佢係投資「貼士」，但細心諗下，其實呢啲大行報告分析員就好似風水佬咁，睇完風水後，讚你間屋坐北向南、風水唔錯，咁你住落又開始風山水起，自信心開始返晒嚟，自自然然你就好信個風水佬，當佢神咁拜啦！
但窮小子認為呢啲大行報告係Marketing成份居多，一啲分析力及說服力都冇，加上投行獎勵機制作祟，使賣方分析員（Sell-side Analyst）不斷免費派貼士催谷股票成交額，佢哋根本唔理個目標價是否能達到，信咗佢隨時可以血本無歸，最令我印象深刻就係呢個大行報告目標價啦：
「《大行報告》AA銀行降銀娛（0027.HK）目標價至87元，評級「買入」（2014年6月12日 – from XXstocks）」
嘩！降咗目標價都俾87蚊，老老實實，AA銀行你有冇申報自己入咗幾多貨啊？銀娛持倉幾多啊？做乜咁睇好銀娛前景啊？中國當時嚴厲打擊緊貪污會影響濠賭股，呢個壞消息會令濠賭股基本因素改變，點解你唔講俾投資者知啊？
所以話呢啲不負責任嘅大行報告，投資者要避之則吉呢！
即刻比較私人貸款 >> https://www.moneyhero.com.hk/zh/personal-loan/personal-instalment
6）市盈率的錯誤信號
市盈率（Price-earning-ratio）是用於計算某股票估值的一個指標，公式為：市盈率（PE Ratio）= 股票價格 / 公司每股盈利。
舉個簡單例子，一間公司的每股股價$100，每股盈利$10，公司市盈率100/10=10倍，即是說A君當初投入$100收購該公司，假設每股盈利維持$10每年，A君要10年時間才能取回初期投資$100的成本！
低市盈率的錯誤信號
好多朋友/投資者覺得低市盈率就係值得投資嘅公司，咁嘅諗法就會錯失咗好多有前景、高增長型公司的投資機會。低市盈率的背後信號是因為市場睇淡該公司嘅增長前景，故投資者不願意付出較高嘅溢價去買入該公司，有可能出現市盈率愈低，但股價繼續沉底的情況。記得上年857中石油$8嘅時候，市盈率不夠10倍，但股價到今年繼續沉底，市盈率跌至7倍，究竟點解？主要原因係市場睇淡未來油價走勢，同埋中石油開始減少派息，盈利前景引起市場懷疑！
滯後的市盈率指標
睇番市盈率條公式，市盈率（PE Ratio）= 股票價格 / 公司每股盈利，公司每股盈利係一個滯後的歷史數據，公司A於今年推出新產品後，市場預測公司A盈利今年會得到改善，故此公司A股價可能炒上，但每股盈利數據未能及時反映，導致公司A市盈率（PE）突然抽高，可能會令投資者誤意為公司A的估值過高，呢個係高市盈率向市場發出的一個錯誤信號。
窮小子認為PE Ratio高的公司不代表估值高，PE Ratio長期處於高位的公司是市場看好該公司未來的盈利能力，最有力的例子就係700騰訊，近年市盈率長期處於40倍-50倍，但股價不斷創出新高。呢個例子你哋可能覺得係馬後炮，但如果錯誤咁認為高市盈率嘅公司就係估值貴，就係唔值得投資，未來將會錯失投資第二隻騰訊嘅好機會！
Text by: 窮小子（https://www.facebook.com/poorguyfans.hk）
——
延伸閱讀：海外物業：投資 日本樓 6大須知
想知道最新嘅理財貼士，就要留意 MoneyHero.com.hk Blog，同埋緊貼我哋嘅 Facebook Page！
回到文章
