渣打信用卡免費四萬蚊現金流

第一：渣打信用卡以往一向有提供免費現金流服務，大家可以喺信用卡透過FPS轉賬將信用額度套現，靈活運用資金。原先呢個推廣去到8月31日完結，踏入九月新一輪推廣只係輕輕延長咗三個月去到11月30日完結。今個月開始，每個月免手續費嘅轉賬限額係$40,000，比以往再少咗$20,000。所以如果大家有需要，趁仲有得玩嗰陣就玩埋佢。重要事情說多次，記得記得，9-11月份免費轉賬限額為四萬蚊！超過咗就要俾手續費㗎啦。條款及細則。

外地商戶以港元結算手續費CBF

第二：最近陸續有唔同嘅信用卡都宣佈由原本豁免CBF (Cross Border Fee)手續費，嚟緊都即將會收取1%手續費。(HSBC由11月9日起、恒生由10月2日起、AEON由11月1日起)，其他一直收緊繼續收！所有外地商戶但以港元結算嘅簽賬則會受到影響。常見嘅例子就係Uber、Netflix 、Agoda等。唔知大家有冇留意月結單，每筆簽賬文字描述個到都會顯示該商戶嘅註冊地點。縱使你係比緊港幣，但其實係一啲外地商戶嘅簽帳。其實都無咩大不了嘅，反正你可以用一啲高回贈嘅網購信用卡，喺回贈嗰度一樣可以抵銷返手續費！

信銀國際外幣兌換5%回贈

第三：今季信銀國際有一個外幣兌換嘅推廣，兌換指定嘅外幣可以有5%現金回贈。未做嘅，你記得把握機會，趁今個月做埋佢！只係喺手機撳幾個掣就可以完成，真係好值得參與。推廣去到今個月尾就完啦！

恒生優越理財嘅升級推廣

第四：近一兩個月存款利率大減，想要高存款息率越嚟越少啦。不過唔知你有無留意，恒生有一個升優越理財嘅推廣，如果你有1M新資金增長就啱哂，最少穩袋$6000 (受條款及細則約束)，是一個可觀嘅現金獎賞。存款期間仲可以做埋定期/投資疊加收益等等。今季嘅推廣今個月會完啦，如果你有需要都可以做升級或者新開戶！以1,000,000資金嚟計，以年利率計回報率都可以有5%或以上㗎。

安信WeWa Card種獎大作戰

第五：安信WeWa Card嘅手機付款6%回贈推廣提早宣佈延續至2025年3月31日。按目前嘅情況嚟睇，安信好有心機想做好張WeWa Card，手機支付就有6%回贈，無再細分類別真係好好用。最近九月仲推出種獎大作戰，每個星期領取任務後，憑卡簽賬滿足指定要求，就可以抽獎啦，想中獎，就種獎！雖然冇之前『WA住簽。WA住賞 2』咁好，可以自己揀禮物，都叫做好過無啦。反正大家都會用佢來做手機簽賬，簽完當拎多個Bonus！

----------

借定唔借？還得到先好借！

作者盡量確保以上資料準確，若任何資料與你到訪的金融機構、服務供應商或特定產品網站有所出入，所有金融產品和服務均以金融機構的版本為準，使用該服務前請參閱相關金融機構網站的最更新版本之產品資訊及條款細則。如資料有誤，歡迎指正。

本文件中如有類似前瞻性陳述之內容，此等內容或陳述不得視為對任何將來表現之保證，且應注意實際情況或發展可能與該等陳述有重大落差。