大新360°「易出糧」服務 之 高息活期存款教學攻略! 衝!

注意：23/9起大新嘅基本活期存款利率將調整至0.625%，港幣存款利率。

2024 年十月份大新360°「易出糧」服務

九月份美國聯儲局正式減息0.5%，市面上好多存款計劃都已經減息了。十月份新登記/重新登記大新360°「易出糧」服務嘅朋友就要接受新嘅利率了。現時最新計劃最高可獲4.775%年利率。雖然仲要做部分任務，但呢個計劃下嘅高息存款係好抵做，成件事係有數圍。想知點樣做就拎到4.5厘以上嘅利息？人人都得，繼續跟住下面就得啦！

> 2024年10月計劃推廣期：2024年 10 月 1 日起至 2024 年 12 月 31 日。客戶可獲額外活期存款年利率至 2025 年 3 月 31 日。條款及細則(2024年10月)。

每月最高可得利率達4.775%

究竟蛋黃會揀邊間嘅高息活期存款，大新360°「易出糧」服務就係其中一間。(新舊客都得，舊客只要去分行重新登記出糧服務就可以啦；利率新舊客一樣)。車，出糧服務要搞到公司喎，佢呢個推廣就係連自己同自己出糧(自己轉錢比自己)都計埋(銀行按時付款服務方式SI / FPS 出糧都得)，出糧冇難度！如果搵公司做自動轉賬出糧利率會高0.1%，不過希望個個都用得著，全文會以SI /FPS出糧討論。

以下嘅Case 就會以SI 出糧同埋做VIP Banking (VIP 額外既0.25%年利率)去介紹，如果做得齊佢嘅任務，佢嘅活期存款年利率係可以去到4.775厘。以呢個數嚟睇應該就贏大部分坊間嘅定期存款，高息活期存款，連 MortgageLink 戶口都要企埋一邊。要獲得高息活期存款，當然要有少少付出啦。不過唔使擔心，極簡單！極簡單！極簡單！我會引導你究竟可以點樣做！

上一期完左嘅計劃，大家記得去分行重新登記先可以繼續享有高息服務。記得登記左，要出一次糧(入一次錢)先 Activate 到，當月就可以享有高息！Enjoy！

高息活期 四個任務

任務一：用佢新推出個張大新多貨幣Master 扣賬卡消費滿$5000 或以上。
(謎之聲：除了消費還可以DIY。)(成本：$60 起)

任務二：用大新嘅信用卡簽帳$3000 以上，可以係零售簽帳，八達通自動增值，同埋繳費都可以。咁我當然唔係做零售簽帳。我會揀係付出少少成本做繳費，佢繳費嘅範圍可以好多㗎，精髓就自己再發掘下(配合其他卡免費套現用)。(繳費成本1%：$30)

任務三：用網上銀行或者手機銀行做一些指定嘅交易。最易當然係做外幣交易，只要每個月最少做一宗(不可累計)交易額達$10000 或以上就可以。你有需要可以揀你自己嘅貨幣，如我無咩外幣需要當然係兌美元。月尾買月頭賣，咁就可以橫跨兩個月了。(每月來回差價成本約$60，計多左架啦)

任務四：用大新證券 App / 網上銀行最少做一宗(不可累計)股票交易達$30000 或以上就可以啦。咁我哋做存款當然想將風險減到最低，你可以揀一啲藍籌股，上市ETF(免印花稅)，務求揀一隻波幅最低最唔會郁嘅Number，去完成你嘅任務。(成本：佣金連存倉費以每月計大約$120)

VIP Banking 專享優惠

計計埋埋你每月成本$360 左右，就可以獲得最多$6000 嘅額外利息，當然睇返你本金有幾大。咁唔夠1M 點算呀？點做VIP Banking 呀？佢每個月服務費要$200。佢呢個服務費喺頭一年係可以豁免㗎。VIP Banking有額外既0.25%年利率(只要持有股票同當月使用大新信用卡就得，基本上同本身出糧戶口要做既任務重疊)，可以係每個月既月結單睇到自己係咪滿足條件。以下就係月結單上既字句。

存款金額每月回報分析

咁以下呢個表就再同大家計吓，如果你有20 萬、50 萬，80 萬，100 萬、150萬，185 萬(頂點)。每月嘅潛在回報究竟有幾多啦！其實只要擺50 萬以上，扣除成本後利率都達3.5 厘以上。已經好正值得去做。真●活期喎。

小總結：蛋黃認為大新360°「易出糧」服務絕對係市面上靈活度最高的存款計劃。如果大家發現打爆左之後個個月差少少先夠$6000，咁你就留意返如果當月只有30 天，理論上要放多少少錢先打得爆。同埋月頭月尾如果係紅日，CUT OFF DAY 都有機會影響當月利息計息天數。如果當中仲有咩問題同想法，歡迎留言或者係蛋黃視野FACEBOOK 同我哋分享同發問。

快速連結在這裏：
360°「易出糧」服務、VIP 銀行服務 (條款及細則)、出糧服務年利率計算機

前計劃資料：2024 年7 月計劃推廣期：2024 年 7 月 1 日起至 2024 年 9 月 30 日。客戶可獲額外活期存款年利率至 2024 年 12 月 31 日。條款及細則(2024年7月)；重新登記條款及細則(2024年7月)。